سياحة وسفر

بوست غريب شوية بس نفسي اللي فيه يتحقق.. انا عايزك بكل بساطة تعمل unfollow لصفحتي…

بوست غريب شوية بس نفسي اللي فيه يتحقق.. انا عايزك بكل بساطة تعمل unfollow لصفحتي لو مش عارف فكرة الصفحة ديه ايه او انا مين..

الحقيقة إن صُحابي دايماً بيستغربوا ليه بَرُد علي المتابعين بطريقة مش ظريفة لو مُتابع تطاول في الكلام مثلا 😄 مع ان اي واحد عامل صفحة علي الفيسبوك لازم يبقي تحت رحمة المتابعين كأنهم العملاء بتوعه و العميل دايماً علي حق..

الفكرة اني مش محتاج ناس عاملة like او follow للصفحة وخلاص، ومش محتاج ناس مش فاهمين انا بعمل ايه، ومش محتاج ناس طريقتهم سُوقية في النقاش، ومش محتاج ناس منفسنين وسطحيين وعندهم غل وحقد الدنيا كله، فا لو شايف السفر تفاهة، او فاكر اني مش حاسس بمشاكل الناس، لو شايف اني غني و معايا فلوس وارثها من بابي عشان بسافر كتير، او لو شايف اني شحات ومعفن عشان الطريقة اللي بسافر بيها، لو انت سيساوي قوي او إخواني قوي، لو شايف مصر اوحش مكان في العالم ومفيش فيها حاجة كويسة، او لو شايف مصر اجمل مكان في الدنيا ومفيش فيها حاجة سيئة، لو انسان مُتعصب لاي فكر، او انسان مُبالغ فيك عامةً وفاكر نفسك انت بس اللي صح ، لو فاكر انك تعرف كل حاجة علي وجه الارض، لو مش هينفع تعترض بطريقة محترمة، لو مش عايز تغير طريقة تفكيرك و تطورها، فا أنا بأكدلك إنك مش هتحب الصفحة ديه..

انا محتاج ناس يعرفوني و اعرفهم، حتي لو كان الرقم مبالغ فيه، العلاقة بيني و بين المتابعين ليا علي الصفحة علاقة مُريبة شوية، يعني نفسياً؛ المتابعين بيوحشوني و بوحشهم، و لما بختفي بيبعتولي رسايل كتيرة جداً يسألوا عليا، وانا بحفظ اسامي الناس اللي بتعلق علي البوستات بتاعتي و برضه بفكر فيهم هما ليه اختفوا.. انا بنزل اقابل اي شخص يبعتلي رسالة يقولي انه في المدينة اللي انا فيها، واللي واقع في مشكلة او عنده استفسار ضروري و بيحتاج رقم تليفوني عشان يكلمني بديهوله، وطلبت من متابعين ينضموا ليا في رحلاتي قبل كده وبدون مقابل مادي وفعلا تقبلوا طلبي و سافروا معايا، بنزل اقعد مع المتابعين علي القهوة، وناس منهم قعدوا في بيتي قبل كده، وكتير قعدت في بيوت متابعين ليا وناس منهم عملت معايا اللي اقرب صحاب ليا معملهوش.. ديه العلاقة اللي نفسي فيها، مش رمرمة أعداد متابعين وخلاص.. أقسم بالله، انا كنت برفض عروض رعاية و إعلانات مش عشان انا مش مقتنع بيهم و بس، لكن عشان أحافظ علي علاقتي بالناس هنا ومحسسهمش اني بستغلهم في اي شئ..

محدش يُسئ فِهم البوست ارجوكم او ياخده بطريقة عدائية، انا عايز الأطراف كلها يبقوا مرتاحين 🙂😘

Marwan Lotfy

عرض المزيد من

Travel like an Egyptian

تعليق
الوسوم

Travel like an Egyptian

أنا مروان لطفي، النهاردة بقي عندي ٣٢ سنة.. من سنتين بالضبط في عيد ميلادي الثلاثين إستقلت من وظيفة ناس كتير بتتمناها في أحسن بنك في مصر.. ليه؟ عشان كنت إنسان تعيس.. شوفت مستقبلي في وشوش اللي شغالين معايا، اللي إطّلق بسبب الشغل واللي مش عارف يشوف عياله واللي عدي ٤٠ سنة وملحقش يتجوز واللي بقي مُعقد نفسياً، وحاجات كتير كل الناس كان لازم تضحي بيها في مقابل الحفاظ علي شغلهم المرموق.. قبل ما أستقيل لجأت للسفر كوسيلة تفريج عن نفسي شوية، و كانت نقطة التحول في حياتي رحلة تطوعية طلعت فيها لزيارة و مساعدة اللاجئين السوريين علي حدود لبنان، وبعد اللي شوفته هناك فهمت معني الحياة، فهمت يعني ايه انا إنسان عايش حياة طبيعية.. طيب وبعدين؟ سؤال سألته لنفسي بعد ما أخدت ضربة قوية بموت إثنين صحابي في ٣ أيام، وحسيت إني عادي جداً ممكن أموت وأنا قاعد علي مكتبي في أي وقت، مش لازم يبقي عندي ٨٥ سنة عشان أموت.. قررت بعدها إني أقدّر كل لحظة عايشها.. وأخدت قرار إني أغير مسار حياتي تماماً، إستقلت من شغلي وإتجهت للسفر كوسيلة لدراسة سلوك الانسان وإستكشاف الحضارات المُهمّشة في كل أنحاء العالم، والكتابة عن السفر وإستخدام الانترنت كوسيلة دخل، مش هتخليني غني، بس هتكفيني أعيش حياة سعيدة.. وبعد ما كنت صرفت نظر عن الجواز نظراً لمتطلبات مجتمعنا العقيمة للجواز من شبكة و مهر و فرح و نيش و صالون و شقة في حي راقي ووظيفة مستقرة ودخل عالي، ربنا رزقني بإنسانة قابلتها أثناء سفري وافقت عليا زي مأنا كده، وإتجوزنا، وقررنا نكمل بقيت حياتنا بدون أي خطط.. مجتمعنا علمنا نتخلي عن أحلامنا في مقابل انك تبقي انسان عايش بواقعية، لو بتحب ترسم فالرسم مابيجبش فلوس، لو بتحب تكتب فامبقاش حد بيقرا، لو بتحب تلعب رياضة فا مش جايبة همها، ولو عندك شغف في حاجة غريبة فهيعتبروك مجنون.. و رغم إن دخل شاب بيطلع يقول نُكت علي الفيسبوك أعلي من دخل أي دكتور أو مهندس عنده ٥٠ سنة، لسه برضه متمسكين بأفكار مجتمعنا العقيمة .. إحنا في سنة ٢٠١٧ وأحب أقولك إن الواقع إتغير، والواقعية اللي اترسخت جواك بقيت غير كده، وانك ممكن ترسم رسمة تبعها علي امازون تدخلك فلوس اكتر من عملية جرّاح بيعملها، وانك ممكن تكتب كتاب يكسر الدنيا و يدخلك فلوس اكتر من مهندس بنا عمارة، كل حاجة بقيت مُتاحة، و سوق الأحلام إتفتح علي الآخر.. مش طالب منك تقيِّم تجربتي و تحترم حلمي، أنا طالب منك تحترم حلمك، وجرّب كل شوية تخرج رجلك خطوة برة منطقة الأمان، أو علي الأقل تسيب اللي تعرفهم يحلموا و ماتحبطهمش، سواء كنت أب أو أم أو أخ أو صاحب.. كل اللي مطلوب هو حلم، وخطوة، ومجهود.. تحديث: رداً علي الناس اللي بتسأل انا بجيب فلوس منين او ازاي ممكن حد يجيب فلوس بإستغلال مواهبه او شغفه بحاجة معينة، ادخل علي البوست ده https://goo.gl/CuWNXq

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

إغلاق
%d مدونون معجبون بهذه: