سياحة وسفر

تجربتي مع Tunisair و مطار قرطاج كانت صعبة جداً رغم إني جربت أرخص خطوط الطيران في…

تجربتي مع Tunisair و مطار قرطاج كانت صعبة جداً رغم إني جربت أرخص خطوط الطيران في العالم و قعدت في مطارات كتير جداً..

– بدايةً بالإقلاع من مطار القاهرة كان أسوء إقلاع طيارة شُفته في حياتي لدرجة إني انا انسان متبلد المشاعر خُفت فعلاً والناس كانت مرعوبة.

– الطيارة إتأخرت ساعة و رُبع عن ميعادها (كان فيه مشكلة مع راكب تقريباً)

– طاقم الطيارة كان عادي ولا ظريف و لا سيء بصراحة.

– نيجي لصالة الترانزيت بقي!!!!! علامات تعجب كتيييييير قوي.. الظباط بصراحة حاولوا يتعانوا معايا جداً عشان يجيبولي استثناء بالموافقة علي طلب التأشيرة عشان اعرف اخد غرفة في فندق علي حساب شركة الطيران بدل ما اقعد ١٦ في المطار، المحاولة فشلت للأسف، مش ديه المشكلة، أنا متعود اقعد ترانزيت طويل جداً، المشكلة في السجن اللي كنا قاعدين فيه:
*موظف الخطوط بياخد الباسبور بتاعك.
*الانترنت ١٥ دقيقة فقط مجاناً.
*صالة الترانزيت اصغر من صالة بيتنا.
*الكراسي مكونة من اربع اجزاء، مسند رأس وظهر ومقعد ومسند قدم، مفيش ولا كرسي فيه الأربع أجزاء، كل الكراسي فيها أجزاء مفقودة 😂
*مفيش مكان تشرب منه مياة!! أيوا قعدت ١٦ ساعة من غير مياة!!
*مفيش مكان تشتري منه اكل و مينفعش تُخرج من السجن تشتري أكل من صالة المطار برّة (كنت بوزع الاكل اللي كان معايا علي الناس)
*مفيش غير ٤ مخارج كهرباء، ٢ في السقف، ١في مدخل الحمام، و ١ عادي في الحيطة.
*مفيش مكان للتدخين فالناس كانت بتشرب في الحمام فا بالتالي الحمام بقي رائحته قمة في البشاعة.

– الطيارة التانية من تونس لتولوز كانت عبارة عن أتوبيس غرب الدلتا تقريباً، مسند اليد بتاع الكرسي بتاعي كان مخلوع، والمسند التاني كنت مقروف احط ايدي عليه، واغطية الكراسي مُهلكة ومقطعة (زي الصور) وطاقم الطيارة كنت بحس إني بطعنهم بخنجر لما بطلب منهم حاجة!!

-استلمت شنطتي من غير الغطاء بتاعها للأسف وانا عارف اني مستحيل اشتكي علي حاجة زي كده، الحمدلله ان الشنطة وصلت أصلاً.

أنا مش متعود أشتكي بس حبيت اشارك تجربتي عشان تحاولوا تتجنبوا علي الأقل الترانزيت في المطار ده خصوصاً لساعات طويلة..

وإحكولي علي تجاربكم في الترانزيت في البلاد التانية كانت عاملة ازاي!؟

#الخطوط_التونسية




عرض المزيد من

Travel like an Egyptian

تعليق
الوسوم

Travel like an Egyptian

أنا مروان لطفي، النهاردة بقي عندي ٣٢ سنة.. من سنتين بالضبط في عيد ميلادي الثلاثين إستقلت من وظيفة ناس كتير بتتمناها في أحسن بنك في مصر.. ليه؟ عشان كنت إنسان تعيس.. شوفت مستقبلي في وشوش اللي شغالين معايا، اللي إطّلق بسبب الشغل واللي مش عارف يشوف عياله واللي عدي ٤٠ سنة وملحقش يتجوز واللي بقي مُعقد نفسياً، وحاجات كتير كل الناس كان لازم تضحي بيها في مقابل الحفاظ علي شغلهم المرموق.. قبل ما أستقيل لجأت للسفر كوسيلة تفريج عن نفسي شوية، و كانت نقطة التحول في حياتي رحلة تطوعية طلعت فيها لزيارة و مساعدة اللاجئين السوريين علي حدود لبنان، وبعد اللي شوفته هناك فهمت معني الحياة، فهمت يعني ايه انا إنسان عايش حياة طبيعية.. طيب وبعدين؟ سؤال سألته لنفسي بعد ما أخدت ضربة قوية بموت إثنين صحابي في ٣ أيام، وحسيت إني عادي جداً ممكن أموت وأنا قاعد علي مكتبي في أي وقت، مش لازم يبقي عندي ٨٥ سنة عشان أموت.. قررت بعدها إني أقدّر كل لحظة عايشها.. وأخدت قرار إني أغير مسار حياتي تماماً، إستقلت من شغلي وإتجهت للسفر كوسيلة لدراسة سلوك الانسان وإستكشاف الحضارات المُهمّشة في كل أنحاء العالم، والكتابة عن السفر وإستخدام الانترنت كوسيلة دخل، مش هتخليني غني، بس هتكفيني أعيش حياة سعيدة.. وبعد ما كنت صرفت نظر عن الجواز نظراً لمتطلبات مجتمعنا العقيمة للجواز من شبكة و مهر و فرح و نيش و صالون و شقة في حي راقي ووظيفة مستقرة ودخل عالي، ربنا رزقني بإنسانة قابلتها أثناء سفري وافقت عليا زي مأنا كده، وإتجوزنا، وقررنا نكمل بقيت حياتنا بدون أي خطط.. مجتمعنا علمنا نتخلي عن أحلامنا في مقابل انك تبقي انسان عايش بواقعية، لو بتحب ترسم فالرسم مابيجبش فلوس، لو بتحب تكتب فامبقاش حد بيقرا، لو بتحب تلعب رياضة فا مش جايبة همها، ولو عندك شغف في حاجة غريبة فهيعتبروك مجنون.. و رغم إن دخل شاب بيطلع يقول نُكت علي الفيسبوك أعلي من دخل أي دكتور أو مهندس عنده ٥٠ سنة، لسه برضه متمسكين بأفكار مجتمعنا العقيمة .. إحنا في سنة ٢٠١٧ وأحب أقولك إن الواقع إتغير، والواقعية اللي اترسخت جواك بقيت غير كده، وانك ممكن ترسم رسمة تبعها علي امازون تدخلك فلوس اكتر من عملية جرّاح بيعملها، وانك ممكن تكتب كتاب يكسر الدنيا و يدخلك فلوس اكتر من مهندس بنا عمارة، كل حاجة بقيت مُتاحة، و سوق الأحلام إتفتح علي الآخر.. مش طالب منك تقيِّم تجربتي و تحترم حلمي، أنا طالب منك تحترم حلمك، وجرّب كل شوية تخرج رجلك خطوة برة منطقة الأمان، أو علي الأقل تسيب اللي تعرفهم يحلموا و ماتحبطهمش، سواء كنت أب أو أم أو أخ أو صاحب.. كل اللي مطلوب هو حلم، وخطوة، ومجهود.. تحديث: رداً علي الناس اللي بتسأل انا بجيب فلوس منين او ازاي ممكن حد يجيب فلوس بإستغلال مواهبه او شغفه بحاجة معينة، ادخل علي البوست ده https://goo.gl/CuWNXq

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
%d مدونون معجبون بهذه: